ਅੱਜ 7 ਮਈ ਹੈ ... ਰਵੀਂਦਰ ਨਾਥ ਟੈਗੋਰ ਦਾ ਜਨਮ ਦਿਨ !! ਮੈਨੂੰ ਇਹ ਦੱਸਣ ਦੀ ਲੋੜ ਨਹੀਂ ਕਿ ਇਹ ਕੌਣ ਸਨ .... ਤੁਸੀਂ ਸਭ ਮੇਰੇ ਤੋਂ ਵੱਧ ਜਾਣਦੇ ਹੋਂ ... ਇਤਫਾਕ ਨਾਲ ਅੱਜ ਮੇਰਾ ਵੀ ਜਨਮ ਦਿਨ ਹੈ ... ਫੇਸਬੁਕ ਕਾਰਨ ਇਸ ਵਾਰ ਇਹ ਮੈਨੂੰ ਯਾਦ ਹੈ , ਨਹੀਂ ਤਾਂ ਅਕਸਰ ਇਹ ਲੰਘ ਜਾਣ ਤੋਂ ਬਾਦ ਹੀ ਯਾਦ ਆਉਂਦਾ ਰਿਹਾ ਹੈ ... ਅੱਜ ਦੇ ਦਿਨ 'ਤੇ ਤੁਸੀਂ ਸਭ ਦੋਸਤਾਂ ਨੇ ਮੈਨੂੰ ਸ਼ੁਭ ਕਾਮਨਾਵਾਂ ਭੇਜੀਆਂ ਹਨ ! ਮੈਂ ਆਪ ਸਭ ਦਾ ਧੰਨਵਾਦੀ ਹਾਂ .... ਤੇ ਅਪਣੇ ਜਨਮ ਦਿਨ ਨੂੰ ਟੈਗੋਰ ਸਾਹਬ ਦੇ ਜਨਮ ਦਿਨ ਦੇ ਜ਼ਸ਼ਨਾਂ 'ਚ ਸ਼ਾਮਲ ਕਰਦਾ ਹਾਂ ...

ਟੈਗੋਰ ਦੀ ਇਕ ਕਵਿਤਾ ਦੀਆਂ ਕੁਝ ਪੰਕਤੀਆਂ : ਮੈਂ ਸਾਰੀ ਉਮਰ
ਆਪਣੇ ਗੀਤਾਂ ਦੇ ਆਸਰੇ
ਤੈਨੂੰ ਲੱਭਣ ‘ਚ ਲੱਗਾ ਰਿਹਾ
ਇਹ ਉਹੀ ਗੀਤ ਸਨ
ਜੋ ਮੈਨੂੰ ਘਰ ਘਰ ਲੈ ਕੇ ਗਏ
ੳਨ੍ਹਾਂ ਸਦਕਾ ਹੀ
ਮੈਨੂੰ ਆਪਣੇ ਸੰਸਾਰ ਦੀ
ਅੰਤਰ-ਸੂਝ ਦਾ ਮੌਕਾ ਮਿਲਿਆ

ਕਾਮਰੇਡ !

ਅੱਜ 5 ਮਈ ਹੈ ! ਕਾਰਲ ਮਾਰਕਸ ਦਾ ਜਨਮ ਦਿਨ !! ਮੈਂ ਜਦੋਂ ਵੀ ਕਿਧਰੇ ਮਾਰਕਸ ਦਾ ਨਾਂਅ ਪੜ੍ਹਦਾ ਸੁਣਦਾ ਹਾਂ ਤਾਂ ਨਾਲ ਦੀ ਨਾਲ ਇਹਦੀ ਬਚਪਨ ਦੀ ਦੋਸਤ ਤੇ ਪਤਨੀ ਜੇਨੀ ਯਾਦ ਆਉਂਦੀ ਹੈ ,ਜਿਸ ਨੂੰ ਘਰੇਲੂ ਸੌਦੇ ਪੱਤੇ ਲਈ ਅਪਣਾ ਬਿਸਤਰ ਤਕ ਵੇਚਣਾ ਪਿਆ , ਰੜੇ ਸੌਂ ਕੇ ਵੀ ਗੁਲਾਬ ਵਾਂਙ ਖਿੜ੍ਹੀ ਰਹੀ ਹੈ ।ਇਹ ਮਾਰਕਸ ਦੀ ਅਜਿਹੀ ਸਾਥਣ ਸੀ ਜਿਸ ਤੋਂ ਸਾਥੀ ਹੋਣ ਦਾ ਮਤਲਬ ਸਮਝਿਆ ਜਾ ਸਕਦਾ ਹੈ ।
ਸਾਰੇ ਸਾਥੀਆਂ ਨੂੰ ਮਾਰਕਸ ਦੇ ਜਨਮ ਦਿਨ ਦੀ ਵਧਾਈ ....ਇਸ ਮੌਕੇ ਮੈਂ ਆਪਣੀ ਇਕ ਕਵਿਤਾ " ਕਾਮਰੇਡ " ਆਪ ਸਭ ਨਾਲ ਸਾਂਝੀ ਕਰ ਰਿਹਾ ਹਾਂ :
 ਕਾਮਰੇਡ

ਸਭ ਤੋਂ ਪਿਆਰਾ ਲਫਜ਼ ਕਾਮਰੇਡ ਹੈ

ਕਦੇ ਕਦੇ ਮੁਖਾਤਿਬ ਹੁੰਦਾ

ਆਪਣੇ ਆਪ ਨੂੰ

ਇਸ ਲਫਜ਼ ਨਾਲ

ਜਾਗਦਾ ਮੇਰੇ ਅੰਦਰ

ਇਕ ਨਿੱਕਾ ਜਿਹਾ ਕਾਰਲ ਮਾਰਕਸ

ਦੁਨੀਆਂ ਬਦਲਣਾ ਚਾਹੁੰਦਾ

ਜੇਨੀ ਲਈ ਲਿਖਦਾ ਪਿਆਰ ਕਵਿਤਾਵਾਂ

ਲਓ ! ਮੈਂ ਆਖਦਾਂ

ਕਾਮਰੇਡ

ਛਾਲ ਮਾਰ ਕੇ ਲੰਘ ਜਾਂਦਾ

ਅਪਣੇ ਆਪ ਨੂੰ ।।

ਨਵ-ਨਿਯੁਕਤ ਅਧਿਆਪਕਾਂ ਦੇ ਹਾਇਕੂ

ਪਿਛਲੇ ਦਿਨੀਂ ਨਵ-ਨਿਯੁਕਤ ਅਧਿਆਪਕਾਂ ਦੇ ਇਕ ਸੈਮੀਨਰ ਚ ਹਾਇਕੂ ਬਾਰੇ ਕੁਝ ਗੱਲਾਂ ਸਾਂਝੀਆਂ ਕੀਤੀਆਂ ਤੇ ਇਹਨਾਂ ਸਭ ਨੂੰ ਵਿਸ਼ਵ ਦੇ ਬੱਚਿਆਂ ਦੇ ਹਾਇਕੂ ਦੀ ਪੁਸਤਕ “ ਹਰੇ ਹਰੇ ਤਾਰੇ “ ਦਿੱਤੀ ਗਈ । ਇਸ ਪੁਸਤਕ ਤੋਂ ਪ੍ਰੇਰਿਤ ਹੋ ਕੁਝ ਅਧਿਆਪਕਾਂ ਨੇ ਮੌਕੇ ਤੇ ਹੀ ਹਾਇਕੂ ਰਚੇ ,ਜੋ ਤੁਹਾਡੇ ਨਾਲ ਸਾਂਝੇ ਕਰ ਰਿਹਾ ਹਾਂ :

੦

ਤੁਰਾਂ ਤਾਂ ਤੁਰੇ

ਬੈਠਾਂ ਤਾਂ ਬੈਠੇ

ਮੇਰਾ ਪ੍ਰਛਾਵਾਂ

ਜਸਵਿੰਦਰ ਪਰਮਾਰ

੦

ਖੂਹ ਦੀਆਂ ਟਿੰਡਾਂ

ਠੰਡਾ ਪਾਣੀ

ਨਾਲੇ ਛਾਂ

ਸੁਖਦੀਪ ਹੀਰੋਂ ਕਲਾਂ

੦

ਲਾਲ ਸੂਹਾ ਚੂੜਾ

ਛਣ ਛਣ ਛਣਕੇ

ਦਿਲ ਧੜਕੇ

ਰਿੰਕਲ ਗੋਇਲ

੦

ਬੋਲ ਨਾ ਸਕਿਆ

ਦੇਖ ਕੇ ਹੱਸਿਆ

ਮਨਮੋਹਨਾ ਚਿਹਰਾ

ਅਵਤਾਰ ਸਿੱਧੂ

੦

ਅੱਜ ਮਿਲੇ

ਸਾਰਿਆਂ ਨੂੰ

ਹਰੇ ਹਰੇ ਤਾਰੇ

ਅਮਨ ਅਗਰਵਾਲ

੦

ਅੱਖ ਖੁੱਲ੍ਹੀ

ਰੰਗ ਦਿਸੇ

ਕਲਮ ਜਾਗੀ

ਮਨਪ੍ਰੀਤ ਕੌਰ ਲੱਲੂਆਣਾ

੦

ਗੁਰਪ੍ਰੀਤ

ਬੈਠਾ ਉਦਾਸ

ਕੌਣ ਸੁਣੇ ਕਵਿਤਾ

ਰਵਿੰਦਰ ਕੁਮਾਰ

੦

ਬੁੱਢਾ ਨਿੰਮ

ਹਰੇ ਪੱਤੇ

ਜੋਸ਼ ਦਾ ਸੁਨੇਹਾ

ਕਮਲੇਸ਼

੦

ਡਿੱਗਿਆ ਬੇਟੂ

ਹੰਝੂ ਦੋ

ਮਾਂ ਦੇ ਸੌ

ਰੀਤੂ

੦

ਪੁੱਟਿਆ ਨਿੰਮ

ਡੂੰਘਾ ਟੋਆ

ਦਿਖਾਵੇ ਡੂੰਘੀਆਂ ਜੜਾਂ

ਸਪਨਾ ਬਾਂਸਲ

ਗੁਲਾਬ

ਇਸ ਵਾਰ ਗੁਲਾਬ ਬਹੁਤ ਲੱਗਿਆ ਹੈ
ਮੇਰੇ ਘਰ

ਸੂਪ ਪੀਂਦਿਆਂ ਆਖਦਾ ਦੇਵਨੀਤ

ਗੁਲਾਬ ਨੂੰ ਲਾਉਣ ਦਾ ਇਹੋ ਢੰਗ
ਟੋਆ ਪੁੱਟੋ ਡੂੰਘਾ
ਰੋੜ੍ਹ ਚੁਗ ਦੇਵੋ ਸਾਰੇ
ਰੂੜੀ ਦੀ ਰੇਹ
ਡੀ ਟੀ ਟੀ ਮਿਲਾਓ ਥੋੜ੍ਹੀ
ਪਾਣੀ ਪਾਓ
ਪੋਲੀ ਕਰੋ ਮਿੱਟੀ

ਦਸਦਾ ਹੈ ਨਾਜ਼ਮ

ਜ਼ਿੰਦਗੀ ਨੂੰ ਜਿਉਣ ਦਾ ਹੋਵੇਗਾ ਇਹੋ ਤਰੀਕਾ
ਸੋਚਦਿਆਂ ਲਿਖੀ ਇਸੇ ਢੰਗ ਨਾਲ ਕਵਿਤਾ

ਜਿਸ 'ਚ ਗੁਲਾਬ ਨੇ ਤੇਰੇ
ਕੰਡੇ ਮੇਰੇ ।।

ਹਿੰਦੀ ਦੇ ਬਲਾਗ ਸੇਤੂ ਸਾਹਿਤਯ ਚ ਪ੍ਰਕਾਸ਼ਿਤ ਕਵਿਤਾਵਾਂ

http://setusahitya.blogspot.com/2008/10/blog-post.html

ਸ਼ਬਦਾਂ ਦੀ ਮਰਜ਼ੀ

http://www.digital.vidhapunjabi.in/gurpreet1.html

ਆਰਸੀ ਚ ਮੇਰੀਆਂ ਕਵਿਤਾਵਾਂ

http://punjabiaarsi.blogspot.com/search/label/%E0%A8%97%E0%A9%81%E0%A8%B0%E0%A8%AA%E0%A9%8D%E0%A8%B0%E0%A9%80%E0%A8%A4